इम्रान अत्तार / विभागीय संपादक – दक्ष पोलीस वार्ता, नाशिक
प्रधानमंत्री क्षयरोग मुक्त भारत अभियान अंतर्गंत ‘निक्षय मित्र’ रोटरी क्लब, नाशिक वेस्ट, नाशिक यांच्याकडून १२ क्षयरुग्णांना पोषण आहाराचे वाटप करण्यात आले आहे. क्षयरुग्णांना मदत करण्यासाठी ज्या संस्था, व्यक्ती पुढे येतात आणि सहाय्य करतात त्यांना ‘निक्षय मित्र’ म्हटले जाते. नाशिक महानगरपालिकेच्या क्षयरोग दुरीकरण कार्यक्रमांतर्गत जिजामाता रुग्णालय, मेन रोड, नाशिक येथे क्षयरोगाचे उपचार घेत असलेल्या १२ क्षय रुग्णांना आज दि. २० जानेवारी रोजी शासनाच्या मार्गदर्शक सूचनांनुसार पोषण आहाराचे वाटप करण्यात आले. मनपाचे आरोग्य वैद्यकीय अधिकारी डॉ. बापुसाहेब नागरगोजे यांच्या मार्गदर्शनाखाली हा उपक्रम राबविण्यात आला. रोटरी क्लब, नाशिक वेस्ट, नाशिक यांच्याकडून सामाजिक बांधिलकी आणि क्षयरोग मुक्त भारत अभियानास सहाय्य म्हणून पुढील ६ महिने १२ क्षयरुग्णांना पोषण आहार देण्यात येणार आहे. उपचार घेत असलेल्या सर्व क्षय रुग्णांसाठी उपचारासोबत पोषण आहार महत्वाचा आहे. त्यामुळे रुग्णांची प्रतिकार शक्ती वाढण्यास मदत होते. रुग्ण लवकर बरा होतो, असे मार्गदर्शन सहाय्यक आरोग्य अधिकारी तथा शहर क्षयरोग अधिकारी डॉ. कल्पना कुटे यांनी केले. निक्षय मित्र रोटरी क्लब यांचे आभार व्यक्त करून यापुढे देखील अधिकाधिक क्षयरुणांना पोषण आहार द्यावा ही विनंती करण्यात आली. कार्यक्रमाचे प्रास्तविक राष्ट्रीय क्षयरोग दुरीकरण कार्यक्रम अंतर्गंत विभागातील समन्वयक भगवान भगत यांनी केले. रोटरी क्लब नाशिक वेस्टच्या अध्यक्षा सोनल शहा, दीपा चांगरणी, जयंत स्थळेकर, उर्मिला हिरसकर यांच्या हस्ते क्षयरुणांना पोषण आहार बास्केटचे वाटप करण्यात आले. याप्रसंगी जिजामाता रुग्णालयाचे वैद्यकीय अधिकारी डॉ. चारुदत्त जगताप, डॉ. स्वाती सावंत, पर्यवेक्षक संदिप गवळी, अभय नाकिल, आशिष वराडे उपस्थित होते.
समाजातील रोटरी क्लब सारख्या सामाजिक संस्था आणि दानशूर व्यक्तींनी क्षयरुग्णांना मदत करण्यासाठी पुढे यावे. सामाजिक बांधिलकी जपत क्षय रुग्णांचे ‘निक्षय मित्र’ व्हावे, असे आवाहन महापालिकेच्या शहर क्षयरोग दुरीकरण कार्यक्रम विभागाने केले आहे.
साजिद शेख
मुख्य संपादक – दक्ष पोलिस वार्ता
संपर्क :- 98221 17037 / 98228 17037
